So‘nggi paytlarda yurtimizda boks hakamlari faoliyatini yanada rivojlantirishga ehtiyoj tug‘ilmoqda. Shu maqsadda O‘zbekiston boks federasiyasi rahbariyati yurtimizdagi boks hakamlari malakasini oshirish, ushbu yo‘nalishda yangiliklarni tatbiq etish borasida amaliy ishlarni boshlab yuborgan.

Bugun shu maqsadda boks hakamlari ishtirokida onlayn yig‘ilish tashkil etildi.

Yo‘lga qo‘yilgan loyiha haqida AIBA musobaqalar o‘tkazish qo‘mitasi, ASBC musobaqalar o‘tkazish komissiyasi a’zosi Shohid Tillaboyev tomonidan tushuntirib berildi.

Ushbu yo‘lga qo‘yilayotgan tizimdan maqsad, boks hakamlarida malakani oshirish, hakamlikda adolat, shaffoflik masalalarini kuchaytirishdan iborat.

Hakamlik masalasidagi muammolar o‘z navbatida seleksiya ishlariga ham ta’sir qilayotgani, buning oqibatida iqtidorlar ko‘zga ko‘rinmay qolib ketayotganligi ta’kidlandi.

Rejaga ko‘ra, 4-7 dekabr kunlari Buyuk Britaniya va Ukrainadan AIBAning tajribali instruktorlari o‘zbekistonlik hakamlar uchun seminar o‘tadi va yangi tizimning mazmun-mohiyati bilan yaqindan tanishtiradi. Seminarda qatnashgan tinglovchilar AIBAning tajribali instruktorlariga imtihon topshirishadi. Bu orqali hakamlarimiz malakasini oshirish va xalqaro arenalarda o‘zbekistonlik hakamlarning sonini ko‘paytirish maqsad qilingan.

O‘zbekiston boks federasiyasi hakamlikda o‘zini sinab ko‘rmoqchi bo‘lgan hamyurtlarimiz uchun tanlov e’lon qilgandi. Ayni paytda hakamlikka talabgorlarni ro‘yxatga olish ishlari davom etmoqda. Mazkur tanlov ham yurtimizda hakamlik korpusini rivojlantirishning muhim bo‘lgan qismlaridan biri hisoblanadi.