Олий Лига клублари янги чемпионат баҳсларига тайёргарлик кўришаётган бўлса, Ўзбекистоннинг турли ёшдаги терма жамоалари муҳим ўйинлар олдидан йиғин ўтказишмоқда.

Хусусан, Ғузорнинг «Шўртан» клуби 9 март, жума куни Алексей Евстафеев қўл остидаги Ўзбекистон U-22 терма жамоасига қарши майдонга тушади. 3-10 март кунлари давомида Тошкентда йиғин ўтказадиган Игорь Криушенко шогирдлари учун бу учинчи ўртоқлик учрашуви ҳисобланади. Бунгача ғузорликлар 5 март куни «Бунёдкор-2»ни 4:0 ҳисобида мағлуб этиб, 8 март куни «Қизилқум» билан 1:1 ҳисобида дуранг ўйнашган эди.

Бундан ташқари, бир йиллик танаффусдан сўнг Олий Лигага қайтган Тошкентнинг «Локомотив» клуби 10 март куни Ўзбекистон олимпия терма жамоасига қарши ўртоқлик учрашувида майдонга тушади. Қайд этиб ўтиш жоиз, “Локомотив” 9 январь куни ҳам Ўзбекистон олимпия терма жамоасига қарши тўп суриб, 1:4 ҳисобида имкониятни бой берган эди.

Эслатиб ўтамиз, 2012 йилги Олий Лига баҳслари 15 март куни старт олади.