Ливан пойтахти Байрут шаҳри мезбонлигида ўтаётган дзюдо бўйича ўсмирлар ва ёшлар ўртасидаги Осиё-Океания чемпионатининг биринчи куни ўз якунига етди.
Бугун ўсмирлар ўртасида жами 8 та вазн тоифасида ғолиб ва совриндорлар номи маълум бўлди. Қувонарлиси, дзюдочиларимиз 8 та вазнда 9 та медаль қўлга киритишди. Шулардан 5 таси олтин, 3 таси кумуш, 1 таси эса бронза медалидир.
Ўз вазн тоифаларида Суҳроб Пўлатов (-60 кг), Элбек Тожиев (-66 кг), Лазиза Ҳайдарова (-40 кг), Улбусин Ҳакимова (-44 кг) ва Муҳайё Аҳматова (-48 кг) Осиё чемпионига айланишди.
Замоҳшари Бекмуродов (-55 кг), Сардор Ҳимматов (-60 кг), Сўғдиёна Рафкатова (-52 кг) кумуш, Фазлиддин Шокиров (-50 кг) эса бронза медалига сазовор бўлди.
