Вақтинчалик «Челси» бош мураббийи вазифасини бажараётган Роберто Ди Маттео «Сток Сити»га қарши Англия чемпионати учрашувидан сўнг ўз фикрлари билан ўртоқлашди. Бу ҳақда «Sky Sports» хабар бермоқда.

Эслатиб ўтамиз, Англия Премьер-лигаси 28-туридан ўрин олган «Сток Сити»га қарши учрашувда лондонликлар 1:0 ҳисобида ғалаба қозонишди.

«Ўйиндан олдин ҳар бир футболчи билан алоҳида гаплашиб, олдинга ҳаракат қилиш кераклигини тушунтириб чиқишга тўғри келди. Менимча, бу жуда муҳим жиҳат», деди италиялик мутахассис.

«Бугун биз айнан шу йўналишда — олдинга қадам ташлай олдик. Биз уч очко эгасига айландик ва бу вазифа ҳеч қачон осон бўлмаган. Мен фақат келажакка қарайман, сиз эса ўтмишни муҳокама қилаверишингиз мумкин. Муҳими, жамоамиз кейинги ўйинга яхши кайфиятда етиб бориши», деди «Челси» устози.

«Биз сўнгги икки учрашувда ғалаба қозондик, учта гол урдик ва дарвозамиз дахлсизлигини сақлаб қолдик. Ўйлашимча, бизга ўз кучимизга бўлган ишонч қайтмоқда», дея қўшимча қилди вақтинчалик «Челси» бош мураббийи этиб тайинланган Роберто Ди Маттео.