Кейинги пайтда ишлари умуман юришмаётган Фернандо Торрес  турли камситилшларга учрамоқда, кимдир у ҳақида латифа тўқимоқда, кимдир карикатурасини чизмоқда. Энг сўнггиси куни кеча Дрогба томонидан ташкиллаштирилган кечада содир бўлди. 

Дидье Дрогба фонди томонидан уюштирилган ушбу тадбирда ҳар ким чўнтагига яраша эҳсон бериши, бу пуллар эса савоб ишларда ишлатилиши маълум қилинди. Агар ким энг кўп эҳсон ажратса ўша бойвачча Дрогба билан бир кун машғулотларда иштирок этиш бахтига ҳам муяссар бўлиши қўшимча қилинди. Худди ким ошиди савдосидагидек ҳар ким атаганини ташлай бошлади сандиқчага. "Ставка" борган сари кўтарилиб борди.

Ниҳоят, тадбирга ташриф буюрган бойваччалардан бири хайрия учун 15 минг фунт-стерлинг пул ажратди ва Дрогба билан машғулотларда иштирок этиш имкониятига эга бўлди. Бироқ, у сўзга чиқиб шундай деди: "Пулни савоб учун бердим, Дрогба билан бир кунлик машғулот ўтказиш имкониятимни Фернандо Торресга ҳадя қиламан. Мендан кўра у ҳозир  муҳтож". Залда кулгу кўтарилди, Дрогба жамоадошини масхара қилган бу саҳоватпешанинг гапига жавоб бермай қўя қолди.  

Кечада Эшли Коул, Жон Терри ва Франц Лэмпард каби футболчилар ҳам иштирок этишди. Шон Райт Филлипс ва Жибрил Сиссе эса DJ лик вазифасини бажариб беришди.