“Барселона” Чемпионлар лигаси гуруҳ босқичининг 6-турида “Бавария”га 0:3 ҳисобида мағлуб бўлди. 

Каталония клуби 7 очко билан учинчи ўринни эгаллади ва турнирдан чиқиб кетди.

Параллель ўйинда “Бенфика” ўз майдонида Киевнинг «Динамо» жамоасини мағлуб этди (2:0) ва 8 очко жамғариб, иккинчи ўриндан Чемпионлар лигасининг 1/8 финалига йўл олди.

“Барселона” 21 йил ичида биринчи марта Чемпионлар лигасининг плей-офф босқичига чиқа олмади. 2000/01 йилги мавсумда “кўк-анорранглилар” гуруҳда “Милан” ва “Лидс”дан кейин учинчи ўринни эгаллаганди.

Ўшанда “Барса” УЕФА Кубогига кириб, ярим финалга чиқди ва ушбу босқичда кубокнинг бўлажак ғолиби “Ливерпуль”га ютқазиб қўйган (0:0, 0:1).