ОЧЛда “Насаф”га рақиблик қиладиган Қатарнинг “Ар-Райан” клуби Қатар юлдузлар лигасининг навбатдаги турида сафардан уч очко билан қайтди.
 
Кеча “Ал-Ғарафа” меҳмони бўлган Диего Агуэре шогирдлари рақибларини 5:1 ҳисобида таслим этишди. Таъкидлаш жоизки, “Ар-Райан” таркибида киритилган барча голларга жамоанинг бразилиялик легионерлари муаллифлик қилишди.
 
Учрашувнинг 4-дақиқасидаёқ Родриго Табата ҳисобни очган бўлса, 29-дақиқада мезбонлар аъзоси Муҳаммад Ясир мувозанатни тиклади - 1:1. Бўлим охирида “Ал-Ғарафа”нинг суриялик легионери Саҳран Муса қизил карточка олиб майдонни тарк этди ва мезбонлар дарвозасига белгиланган пенальтини Леандро аниқ бажариб жамоасини ҳисобда олдинга олиб чиқди - 1:2.
 
Иккинчи бўлимда “Ар-Райан” футболчилари тўлиқ ташаббусни ўз қўлларида сақлаб туришди. Леандро ва Табате ўз дублини нишонлаган бўлишса, яна бир бразилиялик ҳимоячи Натан Отавио ҳам ўз ҳисобига гол расмийлаштирди.
 
Ушбу ғалабадан кейин “Ал-Райан” футболчилари Қатар Юлдузлар лигасида 32 очко билан пешқадам “Лаҳвия” жамоасидан олти очко кам жамғаришган ва турнир жадвалининг иккинчи поғонасида боришмоқда.