Бокс, оғир атлетика ва замонавий бешкураш мусобақалари Олимпия ўйинлари дастуридан чиқарилади.

Қайд этилишича, мазкур уч спорт тури Халқаро Олимпия қўмитаси ижроқўми томонидан 2028 йилги Олимпия ўйинлари дастурининг дастлабки рўйхатига киритилмаган.

Бироқ бу бокс, оғир атлетика ва бешкурашнинг олимпия ўйинлари тизимидан тўлалигича чиқарилганини англатмайди. Уларда ҳали ўз ўрнини сақлаб қолиш учун имконият бор, бунинг учун федерациялар ислоҳотлар ўтказиши ва камчиликларни бартараф этиши лозим.

Хусусан, AIBA (эндиликда IBA) молиявий шаффофликни таъминлаши ва ҳакамларни тайинлаш жараёнини ўзгартириши керак. IWF’дан (оғир атлетика федерацияси) эса мустақил антидопинг дастурини тақдим этиши талаб этилади. Шунингдек, беш кураш мусобақаларига ҳам янги ўзгартиришлар киритилиши кутилмоқда.

Мазкур спорт турларининг Олимпия ўйинлари дастурига қайтарилиши 2023 йилда ХОҚ томонидан қайта кўриб чиқилади.

Ушбу хабарлардан кейин Халқаро бокс федерациясининг навбатдан ташқари конгресси бўлиб ўтди ва унда ташкилот низомидаги бошқарув ислоҳотига қаратилган ўзгартиришлар бир овоздан қабул қилинди. Ташкилот номи ҳам расман AIBA’дан IBA’га ўзгартирилди, деб ёзмоқда Allboxing.

Бундан буён IBA конгресслари ҳар йили ўтказилади. IBA директорлар кенгаши аъзолари сони 18 нафаргача қисқартирилади, номзодларни танлаш мезонлари кучайтирилади ва текшириш жараёни янада самарали бўлади.

Халқаро олимпия қўмитаси мустақил экспертларнинг IBA фаолиятига доир ҳисоботлари ва тавсияларини ижобий баҳолади. Ва федерацияга амал қилиши керак бўлган шартларни айтиб ўтди. Агар шуларга амал қилинса, ташкилот 2023 йилда ўз ўрнини қайтариб олиши мумкин.

Бироқ ҳозирча ХОҚ боксни 2028 йилги Олимпиада ўйинлари дастурига киритмаган, унинг киритилиши ҳам IBA’нинг ушбу шартларга амал қилишига боғлиқ бўлиб қолмоқда.