Чемпионлар Лигаси, Европа Лигаси ва Конференция Лигасининг дастлабки «плей-офф» босқичига қуръа ташлаш маросимидан кейин Footboom мухбири Киев «Динамо»сининг собиқ футболчиси, ҳамюртимиз Максим Шацких билан Ньонда бўлиб ўтган воқеалар хусусида суҳбатлашди.
- Қуръадаги хатоми? Ҳа, бундай ҳолатни биринчи марта кўриб турибман, - деди Шацких. - Демак, шарларни адаштиришибди, бўлиши мумкин. Инсон зоти хато қилади ва мен бунда ҳеч қандай ёмонликни кўрмаяпман.
- Аммо биринчисида «Бенфика»га, кейингисида «ПСЖ»га рўбарў келган «Реал» такрорий қуръа натижаларидан норози...
- Албатта, «Бенфика» «Реал» учун бирмунча осон вариант эди. «ПСЖ» билан қарама-қаршиликни эса Чемпионлар Лигасининг муддатидан олдинги финалларидан бири деб аташ мумкин. Умуман олганда, турнирнинг ушбу босқичида кучсиз жамоалар йўқ. «Реал»га эса, менимча, ким билан ўйнашнинг фарқи йўқ. Улар максимал рақобатга одатланишган. Қолаверса, «ПСЖ» «шалпангқулоқ» учун биринчи даъвогар эмас, мен парижликларнинг ўйинларини кузатдим ва ҳужумига нисбатан уларнинг ҳимояси анча ёмон.
- Демак, «Бенфика» эркин нафас олса бўлади. Шундайми?
- Даргумон. Менимча, Лиссабон жамоасига «Реал»га қарши ўйин осонроқ бўларди. «Аякс»нинг ҳужуми ҳозирги кунда даҳшатли ва буни уларнинг тинимсиз голлар ураётганидан кўриш мумкин. Умуман олганда, нидерландлар жуда қизиқарли футбол намойиш этишмоқда. Тўғри, Португалия жамоалари мураккаб, айниқса, ўз уйларида анча тажовузкор ўйин кўрсатишади. Аммо «Аякс»га қарши сафарда жуда қийин бўлади.
- «Интер» - «Ливерпуль» қарама-қаршилиги ҳақида...
- Булар услуби ва тактикаси жиҳатидан кескин фарқ қиладиган жамоалар. Жуда қизиқарли жуфтлик. Менимча, «Интер» ва «Ливерпуль» ўртасидаги қарама-қаршилик Чемпионлар Лигасининг яна бир муддатидан олдинги финалидир.
- «Бавария»га эса осон рақиб - «Зальцбург» тўғри келди. Сиз ҳам айни фикрдамисиз?
- Мюнхенликларга 1/8 финалда ким рўбарў келишидан қатъи назар, ўша жамоа лаш-лушларини йиғишга тайёргарлик кўраверсин. «Бавария»ни айни дамда тўхтатиб бўлмайди. Бу жамоани ҳали «немис машинаси» деб атай олмаймиз, лекин у ўйинни қандай кучайтиришни билади ва унинг қувват захираси жуда улкан. Умуман олганда, бу жуфтликда сенсация содир бўлмайди. Ўйлайманки, «Бавария» биринчи учрашувдаёқ ҳаммасини ҳал қилади.
- Юрий Вернидуб ва унинг «Шериф»и Европа Лигаси «плей-офф» босқичида «Брага» билан ўйнайди. «Шериф»нинг еврокубоклардаги эртаги давом этиши мумкинми?
- Мумкин, албатта. «Брага» - Португалиянинг даража жиҳатидан 5-жамоаси. Яъни, бу ўтиб бўладиган рақиб. «Шериф» яхши таркиб ва ўйинга эга эканлигини аллақачон исботлаб бўлди. Чемпионлар Лигасида қўлга киритилган 7 очко ҳурматга лойиқ. Вернидуб жамоаси еврокубокнинг камида икки босқичидан муваффақиятли ўта олади. Қолаверса, «Шериф» қишда янада кучайиши мумкин.
МУҲАММАДХОН тайёрлади
