"Пахтакор" ва "Банияс" жамоалари учрашувидан аввалги матбуот анжуманига дастлаб меҳмонлар устози ҳамда ҳимоячи Тамир Муҳаммад ташриф буюришди.
Г.Кальдерон: - “Пахтакор” ва “Ал Иттиҳод” гуруҳимиз фаворитлари ҳисобланишади. Биз эса мана шу квартетда бошқа жамоаларга сюрприз қилмоқчимиз. Эртанги ўйин гуруҳдаги иккинчи ўйин бўлади. Бу ерга келганимиздан сўнг кичик муаммога учрадик. Об-ҳаво туфайли табиий майдонда шуғулланишга улгурмадик.
Т.Муҳаммад: - “Пахтакор” кучли жамоа, лекин биз ғалаба қозонишга ҳаракат қиламиз. Эртанги ўйинга бош мураббийимиз бизни руҳан яхши тайёрлаяпти.
- Таркибда муаммолар борми?
Г.Кальдерон: - Бизда асосий таркибнинг уч нафар аъзоси жароҳат олган. Аммо жамоамиз рақобатбардош. Шу боис уларнинг ўрнини боса оладиган ўйинчилар мавжуд. Жароҳат олганлар орасида испаниялик Йесте ва олимпия терма жамоамиз аъзоси Амир Абдулраҳмон бор.
- Ўзбекистон жамоаларига қарши бир неча марта учрашишга эришгансиз. Юртимиздаги ўзгаришлар ҳақида нима дея оласиз?
- Илк маротаба бу ерга келганимизда ҳеч қандай муаммога учрамагандик. Бу сафар эса қорли об-ҳаво бўлганлиги учун кўпгина муаммоларга дуч келдик. Ҳозирча шуни айта оламан.
- Жамоа вакилларига бугунги об-ҳаво қандай таъсир кўрсатмоқда?
Т.Муҳаммад: - Жамоа Тошкентда яхши жойлашиб олди. Бу иқлимга мослашишга уринмоқдамиз. Бунақа об-ҳаво араб жамоаларига қийинчилик туғдириши аниқ.
