Яқин ўтмишнинг энг сермаҳсул ҳужумчиларидан бири Роналдо Бразилия футбол федерациясини бошқаришга тайёр эканлигини билдирган, фақат ЖЧ-2014дан сўнг. Айни вақтда 35 ёшли "сўйлоқ" Жчнинг маҳаллий ташкилий қўмитасидаги лавозимлардан бирини эгаллаб турибди.
— Мен футболдаги ўз сиёсий карьерамни бошламоқ ниятидаман, — дея Роналдо сўзларини келтиради Folha de Sao Paulo. — Билмадим, келажакда Бразилия футбол федерацияси лавозимига номзод бўламанми-йўқми, бироқ шундай эҳтимолни ҳам назардан қочирмаслик керак. Ўйлашимча, ўйинчи сифатида футболнинг ривожига катта ҳисса қўшдим, нега энди майдон ташқарисида ҳам нафим тегмаслиги керак? Кўрамиз, ЖЧ-2014 дан кейин нималар бўларкин, бошламасига федерациянинг жамики қонунчлик актларини ўқиб-ўрганишим талаб этилади.
Эслатиб ўтамиз, ўтган ҳафтада Рикарду Тейшейра Бразилия футбол федерацияси ўрнини ташлаб кетди. Ҳозирча унинг вазифасини Жозе Мария Марин ўз зиммасига олган.
