Италиялик журналист Жанлука Ди Марцио "Фиорентина" ҳужумчиси Душан Влаховичнинг келажаги борасида ўз фикрини билдириб ўтди.

"Ҳозир ҳар бир клуб ўз сафига Влаховични жалб қилиш борасида ўйлаши керак. Боиси, у ақлбовар қилмас машина. Сўнгги 12 ой ичида у энг кўп ўсишга эришган футболчи. Боз устига, у жуда иқтидорли.

"Ювентус" у билан шартнома имзолашни истайди, аммо унинг агентлари кўп пул сўраётгани учун бу ишни амалга ошириш қийин бўлади. А серия клублар, хусусан, "Ювентус" ёзда Душан учун курашиши жуда қийин кечади.

Влахович ёзгача "Фиорентина"да қолмоқчи. У "Фиорентина"ни еврокубокларга олиб чиқмоқчи. У "Фиорентина"нинг Европа лигаси ёки Чемпионлар лигасига чиқишида ёрдам бермоқчи. Аммо бу осон иш эмас. Влахович жамоани бошни тик кўтарган ҳолда тарк этмоқчи. Кейинчалик уни ёмонотлиқ қилишларини истамайди.

Кўп нарса даъвогар клубнинг қандай лойиҳа ва қанча маош таклиф қилишига боғлиқ. Масалан, унинг агентлари "Арсенал" билан ҳаттоки гаплашишни исташмаяпти. "Арсенал" унинг кейинги фаолияти учун етарли даражадаги клуб эмас. Улар кўпроқ "Тоттенхэм", "Манчестер Сити" ёки "Манчестер Юнайтед" ҳақида ўйлашмоқда.

Антонио Конте бошқарувидаги "Тоттенхэм" — унинг учун тўғри танлов. У Харри Кейннинг ўрнини босиши ёки у билан бирга бир йил тўп тепиши мумкин. Душан Харридан баъзи нарсаларни ўрганиши мумкин. Кейн билан бир йил фаолият юритиш — тўғри қадам бўлиши керак.

Гвардиоланинг "Сити"си эса тактик нуқтаи назардан Влахович учун айни пайтдаги тўғри қарор бўлмайди. Ўйлашимча, у дастлаб Антонио Конте қўл остида ўйнаши лозим. Аммо "Тоттенхэм" ушбу трансфер учун керакли барча пулни тўлайдими ёки йўқми, билмадим. Аммо Влахович фаолиятининг ҳозирги босқичида "Тоттенхэм" тўғри вариант бўларди", – деди журналист.