Аргентина терма жамоасининг собиқ ҳимоячиси Фабрисио Колокчини фаолиятини якунлаганини элон қилди, деб хабар беради Sky Sports.
Серхио Агуэродан кейин яна бир аргентиналик афсонавий футболчи мухлислар билан хайрлашди. «Мен футболдаги барча орзуларимни амалга оширдим», деб ёзади Колокчини.
Келинг, унинг фаолиятига қисқача тўхталамиз. Ундаги энг яхши йилларини оқ-қора чизиқдаги футболкада ўтказган.
Марказий ҳимоячи 39 ёшида профессионал фаолиятини якунламоқда. Колокчинининг сўнгги клуби Аргентинанинг «Алдосиви»си бўлиб, у шу йилнинг июль ойидан бери бу ерда ўйнаган. Ҳимоячи Европада «Депортиво» ва «Ньюкасл»даги ўйинлари билан танилган эди. Фабрисио иккита фуқароликка эга (Аргентина ва Италия), лекин у Аргентина терма жамоасида ўйнашни танлаган. Айнан шу мамлакатларнинг гигант клубларида у ўз фаолиятини бошлади, хусусан, «Бока Хуниорс» ва «Милан»да, у жами учта ўйин ўтказди ва битта гол урди. Ҳа сал ғалатироқ эшитилиши мумкин, лекин шундай.
«Милан» учун у битта ўйин ўтказди. Бироқ у бу клубда олти йилдан камроқ вақт давомида тўп тепган. Ўшанда «россонерилар» ҳимоясида Малдиниларнинг рақобатини синдириш қийин эди. Шу сабабли бўлса керак, Фабрисио «Милан»да кўп вақтини ижарада ўтказди. «Сан-Лоренсо»даги муваффақиятли даврлардан сўнг, Ла Лига клублари унга эътибор қарата бошлади. Испанияда у бир мавсумни «Алавес», «Атлетико» ва «Вильярреал»да ўтказди. Ла Лига сафарини омадсиз ўтди дейиш қийин.
2004 йилда Колокчини яна «Милан»га қайтди, лекин ўз клуби учун бирорта ҳам ўйин ўтказишига имкон берилмади ва 2005 йилнинг қишида у Испаниянинг «Депортиво Ла Коруня» клубига сотилди ва у ерда ниҳоят барқарорликка эришди.
Галисия клубидаги тўрт йиллик фаолияти давомида Фабрисио 105 та ўйин ўтказиб, 4 та гол урган.
2008 йилнинг август ойида Колокчини «Ньюкасл Юнайтед» билан 5 йиллик шартнома имзолади.
Шунингдек, Аргентина терма жамоасида Фабрисио 39 та ўйин ўтказиб, битта гол урган. Бундан ташқари, у 2001 йилги ёшлар ўртасидаги жаҳон чемпионати ва 2004 йилги Олимпия ўйинлари ғолибига ҳам айланди. «Ньюкасл» шон-шуҳрат залида у Алан Ширер ва Пол Гаскойн каби афсоналар орасида шарафли ўрин эгаллайди.
