Каталониянинг "Барселона" клуби президенти Жоан Лапорта ўзининг "Twitter"даги расмий саҳифаси орқали жамоа мухлисларига мурожаат йўллади.

- Биз янги йўлдан юришни бошладик. Клубда катта ўзгаришлар рўй берди, жумладан мураббийлар штаби ҳам янгиланди. Таркибимизда Гави, Нико ва кўплаб иқтидорли футболчилар бор. Янги йилдан бошлаб аста-секин юқорига кўтарилишни режалаштирганмиз. Биз Ла Масиядаги иқтидорли футболчилардан иборат ёш жамоани тузмоқчимиз. Уларга ёрдам бериш мақсадида жамоага янги футболчиларни ҳам таклиф қиламиз. 2022 йилда "Барселона"ни клуб тарихидаги энг муҳим лойиҳа - "Espai Barca" кутиб турибди. Бу "Камп Ноу"ни глобал реконструкция қилишни англатади, шунингдек, клубнинг барча инфратузилмасини яхшилайди. Клубнинг молиявий аҳволини тиклаш учун қаттиқ меҳнат қиламиз. "Барселона" бошқа клублар учун яна ўрнак бўлиши керак, - деди Лапорта.