24 март куни Вьетнам пойтахти Ханойдаги “Шератон” меҳмонхонасида Лондон-2012 олимпиядаси тўртинчи плей-офф босқичида иштирок этувчи уч мамлакат – Сурия, Уммон ва Ўзбекистон олимпия терма жамоаси менежерлари, шунингдек, ОФК ташкилий қўмитаси вакиллари иштирокида учрашув бўлиб ўтди.
Унда иштирокчилар саралаш босқичи, унда бўлиб ўтадиган ўйинлар масаласини муҳокама қилишди. Асосий эътибор, табиийки, 25 март куни Уммон ва Сурия олимпия терма жамоалари ўртасида бўлиб ўтадиган илк учрашувга қаратилди. Мазкур беллашувда мезбон мақомида дея эътироф этилган Сурия олимпия терма жамроаси қизил либосда ҳаракат қилса, Уммон олимпия терма жамоаси “Май Дин” стадионига оқ формада чиқиб келади.
Саралаш турнири якунига кўра жамоалар қуйидаги мезонларга асосан ўринларга жойлаштирилади:
- Плей-офф ўйинларида энг кўп очко жамғарган жамоа;
- Плей-оффда урилган ва ўтказиб юборилган голлар нисбати;
- Плей-офф ўйинларида энг кўп гол киритган жамоа.
Агар икки ёки уч терма жамоа бир хил натижа қайд этса, жамоалар ўринларга қуйидагича жойлаштирилади:
- Ўзаро ўйинда қўлга киритилган энг кўп очко;
- Ўзаро ўйинда урилган ва ўтказиб юборилган голлар нисбати;
- Ўзаро ўйинда энг кўп гол киритган жамоа.
Агар барча кўрсаткичларга кўра икки жамоа бир хил натижа қайд этган бўлса, у ҳолда 31 март куни ўзаро қўшимча ўйин ташкил этилади.
