FIFA матбуот хизмати 2021 йилнинг энг яхши мураббийи совринига номзод бўлган уч нафар футбол мутахассиси рўйхатини эълон қилди. Булар испаниялик Пеп Гвардиола (“Манчестер Сити”, Англия), италиялик Роберто Манчини (Италия терма жамоаси) ва германиялик Томас Тухель (“Челси”, Англия). Бу ҳақда ФИФАнинг твиттердаги саҳифасида маълум қилинди. 

Гвардиола ўтган йили “Манчестер Сити” билан бирга АПЛ ва Англия кубогида ғолиб чиққан эди. Манчини Италия терма жамоасини 2020 йилги Европа чемпионатида ғалабага олиб келди. Томас Тухель “Челси” билан Чемпионлар лигаси ва УЕФА Суперкубогини қўлга киритди.

17 январь куни Швейцариянинг Цюрих шаҳрида “The Best” мукофотни топшириш маросими бўлиб ўтади. “Ливерпуль” устози Юрген Клопп 2020 йилнинг энг яхши мураббийи совринининг сўнгги ғолиби бўлди.