«Лацио» юлдузи Чиро Иммобиле сўнгги олти мавсумнинг ҳар бирида камида 15 та гол урган учинчи футболчига айланиши мумкин.
Римликлар сардорида бугун тунда «Интер»га қарши бўлиб ўтадиган ўйин олдидан 14 та гол мавжуд.
Агар у «нерадзуррилар»га қарши ўйинда рақиб дарвозасини ишғол қилса, охирги олти мавсумнинг ҳар бирида камида 15 та гол урган учинчи футболчига айланади.
Бу жараёнда Чирогача фақат Муҳаммад Салоҳ ва Роберт Левандовскилар ички лигада шунча гол уришга муваффақ бўлишган.
Маълумот учун, «Ливерпуль» вингери жорий мавсум Премьер-лиганинг 20 ўйинида 16 та гол урган бўлса, полшалик футболчи 2021/22 йилги мавсумда Бундеслиганинг 18 та ўйинида 20 та гол уришга эришган.
