“Милан”нинг асосий икки марказий ҳужумчиси 75 ёшда. Оливье Жиру 35, Златан Ибрагимович 40 ёшда. “Монако”дан ижарага олинган Пьетро Пеллегри ҳам бор, лекин ҳали ундан тўлиқ ўйнатмаяпти. Жорий мавсумда 20 ёшли ҳужумчи А серияда 6 та ўйин ўтказиб, гол ура олмади. “Қизил-қоралар” уни тўлиқ сотиб олишлари даргумон.
Ибрагимович кетма-кет иккинчи йил “Милан”нинг энг яхши тўпурари бўлиб келмоқда, бироқ швед футболчиси аввалгидан кўпроқ жароҳат олмоқда. “Россонерилар” рақобатбардошликни сақлаб қолишни истаса, ҳужум чизиғини ёшартириши ва кучайтириши керак. Бунда уларга баъзи ўйинчилар ёрдам бериши мумкин.
Андреа Белотти
Клуб: “Торино”
Ёши: 28 ёш
Белотти Италияда энг кўп тилга олинадиган футболчилардан бири. Ёзда у эркин агентга айланади ва ҳозирда бошқа клублар билан музокара олиб бориши мумкин. “Торино” мавсум охирида энг яхши тўпурарини қўлдан чиқариши мумкинлигини тасдиқлади. Аммо, бу мавсумда Андреа олдинги йиллардагидек самарали эмас, лекин у ҳамон трансфер бозоридаги муҳим фигура бўлиб қолмоқда.
Энг муҳими, у Италияни тарк этишни истамаяпти. Узоқ вақт давомида “Милан” футболчи учун асосий даъвогар ҳисобланган. Сўнгги пайтларда “россонерилар”нинг Сан-Сиродаги қўшнилари ҳам футболчини ёзда эркин агент сифатида қўлга киритиш учун курашиш ниятида экани хабар қилинмоқда. Белотти ҳар қандай итальян клуби ҳужумини кучайтириш учун яхши вариант ва “қизил-қоралар” бундан мустасно эмас.
Жонатан Дэвид
Клуб: “Лилль”
Ёши: 21 ёш
Сўнгги пайтларда Дэвид билан боғлиқ шов-шувли хабарлар тарқалмоқда. Буни тушуниш мумкин, чунки канадалик ёш иқтидор “Лилль”да ўзини яхши кўрсатмоқда. Жорий мавсумда ҳужумчи барча турнирларда 27та ўйин ўтказиб, 16та гол урган. “Милан” учун ёш ва тиришқоқ ҳужумчи жуда фойдали бўларди, лекин кўплаб топ-клублар ҳам унга қизиқиш билдирмоқда.
Футболчининг клуб билан шартномаси 2025 йилнинг июнига қадар тузилган. Бироқ, Жонатаннинг агенти яқинда мижози жорий мавсум якунлангандан сўнг “Лилль”ни тарк этишини эълон қилди. Дэвиднинг агенти ўйинчи учун “Челси”, “Ливерпуль” ва “Барселона” каби клубларнинг таклифи қизиқ туюлмоқда деб айтган, аммо бу унинг учун бошқа ҳеч ким рақобатлаша олмайди дегани эмас. “Россонерилар” канадалик футболчини қўлга киритиш ҳақида ўйлаб кўриши керак.
Александр Исак
Клуб: “Реал Сосьедад”
Ёши: 22 ёш
Исак Европа чемпионатидан кейин кўплаб клубларнинг эътиборини тортди. Ҳозирга келиб, футболчи атрофидаги шов-шув бироз босилган, аммо миш-мишлар бутунлай тўхтагани йўқ. Сўнгги хабарларга кўра, “Арсенал” ёш шведни билан шартнома имзолаш вариантини кўриб чиқмоқда. “Милан” ҳам бу футболчига этибор қаратиши керак.
Исак ёш ва умидли ҳужумчи ҳисобланади. Бир ярим мавсумда у Ла Лигада 21 та гол урди. Бундай футболчилар “қизил-қоралар”га керак бўлиши мумкин. Ҳужумчи учун курашда “россонерилар” учун плюс томони таркибда Ибрагимовичнинг борлиги бўлиши мумкин. Ибра ўз ватандошини қаноти остига олиб, ўзининг вориси қилиши мумкин. Исак учун “Милан”га ўтиш олдинга қадам бўлиши, шунингдек, Чемпионлар лигасида ўйнаш ва Скудетто учун курашиш имконияти бўлиши мумкин.
Луис Муриэль
Клуб: “Аталанта”
Ёши: 30 ёш
Муриэль ёш футболчи эмас. Лекин, бу деярли ҳар қандай итальян клуби учун тайёр ҳужумчи. Луис А серияда яхши ўйнаяпти ва кўпроқ ўйин малиётига лойиқ. Бундай форвард учун ҳар бир ўйинда бир тайм ёки ундан ҳам камроқ ўйнаг яхши кўрсаткич эмас. Шу билан бирга, ўтган мавсумда колумбиялик футболчи Италия чемпионатида 22 та гол уриб, ҳар бир ўйинда ўртача 40 дақиқани майдонда ўтказган.
Муриэль “Милан”да кўпроқ ўйнаши мумкин. Албатта, “Аталанта” ўз ҳужумчисини чемпионатдаги рақибига бериши даргумон, аммо “россонерилар” ҳаракат қилиши мумкин. Унинг келиши билан “қизил-қоралар” ҳужумда самаралироқ ва кучлироқ ўйнаши мумкин.
Дивок Ориги
Клуб: “Ливерпуль”
Ёши: 26 ёш
Ориги — “Ливерпуль”да омадсизликка учраган ажойиб ҳужумчи. Юрген Клопп бельгиялик футболчини кам майдонга туширади, аммо шу баҳсларда ҳам максимал тарзда гол уришни уддалайди. Аммо, барибир заҳира ўйинчиси бўлиб қолмоқда. Ҳужумчи ўйнашга лойиқ. Италия чемпионатидан футболчига катта қизиқиш бўлмоқда. Футболчини “Ювентус”, “Аталанта”, “Интер” ва “Милан” клублари кузатиб бормоқда. “Нерадзуррилар” форвардга асосий давогар ҳисобланишади, аммо “россонерилар” ҳам Дивок учун курашиши мумкин. “Қизил-қоралар”нинг собиқ яримҳимоячиси Деметрио Альбертини ҳам худди шундай фикрда. Италиялик футболчининг фикрича, Ориги А серияга тезда мослашади ва кўп гол уради.
Душан Влахович
Клуб: “Фиорентина”
Ёши: 21 ёш
Влахович ҳозирда нафақат А серияда, балки жаҳон футболида ҳам энг кўп тилга олинадиган футболчи ҳисобланади. Биринчидан, серб 5 ой ичида эркин агентга айланиши мумкин. Иккинчидан, у Италия чемпионатининг жорий мавсумдаги тўпурари бўлиб, энг яқин тақибчиси Чиро Иммобилени 3 та гол фарқи билан ортда қолдирмоқда.
Бир томондан, “Милан” учун ПСЖ, “Манчестер Сити” каби клублар билан ўйинчи учун курашиш қийин бўлади. Аммо “россонерилар”нинг ёш ҳужумчига таклиф қиладиган нарсаси бор: Чемпионлар лигаси, скудетто учун кураш, чемпионлик, асосий таркибдан кафолатланган жой. Бундай ҳолатда Ибрагимовични иккинчи футболчига айлантиришга туширишга тўғри келади.
Жамшиджон Маҳмудов таржимаси.
