Собиқ «Арсенал» футболчиси Эммануэль Адебайор нима учун Франция терма жамоасини эмас, Того термасини танлагани ҳақида фикр билдирди. Ҳужумчи бу ҳақида шундай дейди:

«Мен ушбу қарорни кейинчалик қабул қилганман. Чунки 15-16 ёшларимда менда танлаш имкони бўлмаган. Улғайгач эса, ўзимни Француз сифатида, Франция термасида кўра олмадим. Мен ўз уйимга қайтишим керак эди. Мен тоголикман. Мен у ерда туғилганман.

Шундай экан, бир кун келиб африкалик сифатида ўлим топаман. Шу нарсаларни ўйлаб ҳам бу қарорга келдим. Дунёда она юртдан яхшироқ жойнинг ўзи йўқ. Қаерда бўлма, аслинг ким эканини унутмаслигинг керак. Мен футболчи сифатида беш марта Африка чемпионатида иштирок этдим ва бундан бахтиёрман».

Адебайор ўсмирлик чоғида Франция ёшлар терма жамоасида тўп тепган. Кейинчалик эса, Того терма жамоаси шарафини ҳимоя қила бошлаган.