“Наполи”нинг 34 ёшли футболчиси Дрис Мертенс “Барселона”да ижара асосида ўйнаётган ҳужумчи Люк де Йонгнинг ўрнини эгаллаши мумкин. Голландиялик футболчи “Севилья”дан ижарага олинган.
Мертенс “Наполи”да 2013 йилнинг ёзидан бери тўп суради. Ҳужумчи жорий мавсум А сериянинг 15та ўйинида майдонга тушиб, 6та гол урди. У Европа Лигасининг тўртта ўйинида ҳам ўз номини таблога ёздириб қўйган.
31 ёшли Де Йонг “Барселона” сафида ўтказган сўнгги учта ўйинда учта гол уришга эришган. Ҳужумчи Испания чемпионатида “Мальорка” ва “Гранада” дарвозабонларини ранжитган, шунингдек, мамлакат Суперкубогида “Реал” дарвозаси ҳам ишғол қилган.
