“Реал Мадрид” келаси ёзда эркин агентга айланиши мумкин бўлган ПСЖ ҳужумчиси Килиан Мбаппе билан шартнома шартлари бўйича дастлабки келишувга эришишга уриниб кўрмоқда.

АВС нашри хабарига кўра, Мадрид клуби футболчи билан йилига 21 миллион евро маош оладиган 6 йиллик шартнома борасида келишиб олган. Қўшимчасига Мбаппе 40 миллион евро бонус олади. Шунингдек, у визуал ҳуқуқларнинг 50 фоизини олади.

Хабар қилинишича, ПСЖ Мбаппега 2022 йилда Қатарда бўлиб ўтадиган жаҳон чемпионатида ўз футболчиси сифатида ўйнаш имконияти билан 2024 йилгача шартнома таклиф қилган. Агар Килиан Францияда қолишга рози бўлса, “Реал” Мбаппе фикридан воз кечади.

23 ёшли ҳужумчи жорий мавсумда ПСЖ сафида барча турнирлар доирасида 26 та ўйинда майдонга тушиб, 19 та гол урди ва 12 та голли узатмани амалга оширди.