Францияда жорий қилинган мажбурий вакцина қоидаси туфайли Европа чемпионлар лигасининг 2та учрашув бошқа майдонга кўчирилиши мумкин. Гап «Лилль» - «Челси» ва «ПСЖ» - «Реал» ўйинлари ҳақида кетмоқда.

«УЕФА февраль ойида бошланадиган клублар ўртасидаги мусобақа олдидан бутун Европа бўйлаб барча томонлар билан алоқани ушлаб турибди. Учрашувларни ўтказиш билан боғлиқ шартлар мамлакатларнинг соғлиқни сақлаш вазирлиги ихтиёрида. Ҳар бир клуб ўйин бўлиб ўтадиган мамлакат қоидаларига бўйсуниши керак. Аммо плей-офф босқичи баҳсларини ўтказиш учун коронавирус билан боғлиқ махсус қоидалар ишлаб чиқилмоқда. Ушбу қоидалар қўшимча тавсияларни беради», - дейилади УЕФА баёнотида.

УЕФА қоидаларида айтилишича, мезбон жамоа нейтрал мамлакатда жойлашган захира майдонини таклиф этиши керак.

Эслатиб ўтамиз, Францияда қабул қилинган қоидага кўра, футболчилар мажбурий равишда вакцина олиши керак. Бу қоида мамлакатга ташриф буюрадиган бошқа давлат клубларига ҳам тегишли. Ҳозирда «Челси» ва «Реала» клублари сафида вакцина олмаган футболчилар бор.