Бундеслиганинг 20-туридан ўрин олган «РБ Лейпциг» — «Вольфсбург» ўйинида, «буқалар» рақиб дарвозасига жавобсиз иккита гол урди. «Лейпциг» учун бу ғалаба Бундеслигадаги ўйинлар бошланганидан бери юзинчи ғалаба бўлди. 2009 йилда ташкил этилган жамоа 2016 йилда Германия чемпионатининг юқори дивизионига чиқди ва 2016/2017 йилги мавсумдан бошлаб Бундеслигада барқарор ўйнаб келмоқда.

100 та ғалабага эришиш учун «РБ Лейпциг»га 190 та ўйин керак бўлди, бу бир пайтлар «Бавария»га керак бўлган ўйиндан атиги бешта кўп. Бу кўрсаткич бўйича кучли бешликда, «Кёлн» (100 ғалаба учун 206 ўйин), Менхенгладбахнинг «Боруссия»си (100 ғалаба учун 217 ўйин) ва Бундеслигадаги 227-ўйинида 100-ғалабасини қўлга киритган «Боруссия Дортмунд» ҳам бор.