Бугун Миллий Олимпия Қўмитасида ўзбек спорти, хусусан, футболимиз ривожига улкан ҳисса қўшган инсон Элмар Аминовнинг 90 ёшлик юбилейи муносабати билан қутлов маросими бўлиб ўтди.
Унда МОҚ раиси Рустам Шоабдураҳмонов, Ўзбекистон футбол ассоциацияси биринчи вице-президенти Равшан Эрматов, Қўмита Бош котиби Ойбек Касимов, Тўлаган Исоқов бошчилигидаги футболимиз ва ўзбек спорти фахрийлари, шунингдек, вазирлик вакиллари иштирок этди.
Маросимда 1959-йил Ўзбекистон футбол федерациясига асос солинганида, Элмар Алимович ушбу ташкилотнинг раҳбари этиб тайинланиб, ташкилотнинг пойдеворига дастлабки тамал тошларини қўйганлиги юксак ҳурмат билан эътироф этилди.
Шунингдек, Элмар Амиловнинг “Пахтакор” жамоаси бошлиғи, Собиқ Иттифоқ даврида мамлакатимиз спорт қўмитаси раҳбари, 1990-1992-йилларда Ўзбекистон футбол федерациясининг биринчи вице-президенти сифатидаги намунали фаолиятлари ёдга олиниб, мамлакатимизда футболини ривожлантиришда қўшган ҳиссаси учун миннатдорчилик билдирилди.
Тадбир давомида Элмар Алимовичга ЎФАнинг махсус эсдалик совғаси топширилди. Ўз навбатида, Элмар Алимович давлатимиз томонидан кўрсатилаётган бундай эътибордан мамнун эканини билдирди ва барчага ўзининг ташаккурини изҳор қилди.