Bugun Milliy Olimpiya Qo‘mitasida o‘zbek sporti, xususan, futbolimiz rivojiga ulkan hissa qo‘shgan inson Elmar Aminovning 90 yoshlik yubileyi munosabati bilan qutlov marosimi bo‘lib o‘tdi.

Unda MOQ raisi Rustam Shoabdurahmonov, O‘zbekiston futbol assosiasiyasi birinchi vise-prezidenti Ravshan Ermatov, Qo‘mita Bosh kotibi Oybek Kasimov, To‘lagan Isoqov boshchiligidagi futbolimiz va o‘zbek sporti faxriylari, shuningdek, vazirlik vakillari ishtirok etdi.

Marosimda 1959-yil O‘zbekiston futbol federasiyasiga asos solinganida, Elmar Alimovich ushbu tashkilotning rahbari etib tayinlanib, tashkilotning poydevoriga dastlabki tamal toshlarini qo‘yganligi yuksak hurmat bilan e’tirof etildi.

Shuningdek, Elmar Amilovning “Paxtakor” jamoasi boshlig‘i, Sobiq Ittifoq davrida mamlakatimiz sport qo‘mitasi rahbari, 1990-1992-yillarda O‘zbekiston futbol federasiyasining birinchi vise-prezidenti sifatidagi namunali faoliyatlari yodga olinib, mamlakatimizda futbolini rivojlantirishda qo‘shgan hissasi uchun minnatdorchilik bildirildi.

Tadbir davomida Elmar Alimovichga O‘FAning maxsus esdalik sovg‘asi topshirildi. O‘z navbatida, Elmar Alimovich davlatimiz tomonidan ko‘rsatilayotgan bunday e’tibordan mamnun ekanini bildirdi va barchaga o‘zining tashakkurini izhor qildi.