Мюнхеннинг «Бавария» клуби бош мураббийи Юлиан Нагельсманн Бундеслига доирасида «Герта» (4:1) жамоасига қарши бўлиб ўтган учрашувдан кейинги фикрлари билан ўртоқлашди.

«Кўрсатган ўйинимиздан қониқиш ҳосил қилдим. Рақибга қарши прессинг уюштириш борасида жуда яхши ўйнадик, кўплаб голли вазиятларни яратдик ва тўпни жуда яхши назорат қилдик. Иккинчи бўлимда «Герта» бироз "уйғонди", лекин, ҳақли ғалабага эришдик.

Ўтказиб юборган голимиз мени яратган вазиятларимиздан кўра кўпроқ ташвишга солмоқда. «Герта»да битта вазият бўлди ва бундан унумли фойдаланди, қолган вазиятларда яхши ҳимояландик. Бу керак бўлмаган гол эди. Гол киритилган вазиятда бизга босим бўлмади - шунчаки тўпни ушлаб туришимиз ва рақиб нима қилишга уринишини кузатиб туришимиз керак эди. Ҳисоб 4:0 бўлганидан кейин вазиятни янада яхшироқ назорат қилишимиз керак эди. Мануэль Нойер ҳам ўз дарвозаси даҳлсизлигини сақлаб қолмоқчи эди, шу сабабли, у ҳам бироз ғазабланди», – деди Нагельсманн.