Ўртоқлик учрашуви.

“Навбаҳор” – “Турон” – 2:1 (2:0)

26 январь. Наманган. “Марказий” ўйингоҳ. 4250 томошабин.

Ҳакамлар: Ғайрат Жўраев, Исроил Имомназаров, Аъзам Маҳмуджанов.

Голлар: Игорь Голбан (16), Зоран Марушич (38) - Рустамхон Азимов (55).

“Навбаҳор”: Раҳимжон Давронов, Боян Цигер, Игорь Голбан, Хуршид Мухторов, Даврон Ҳошимов, Йован Жокич, Жамшид Болтабоев, Жамшид Искандеров, Элгужа Григалашвили, Ислом Кенжабоев, Зоран Марушич.

Захирадан майдонга тушганлар: Станислав Андреев, Нурилло Тўхтасинов, Эҳсони Паншанбе, Иброҳим Ғанихонов, Сардор Теляков, Шерзод Ғуломжонов, Андрей Сидоров, Мирзоҳид Мирзамаҳмудов, Абдулҳай Исмоилов.         

“Турон”: Акмал Турсунбоев, Хушнудбек Авилов, Бобур Қосимов, Ғолиббек Сарибоев, Жамолхон Баҳромов, Абдуғани Камолов, Аъзам Алиев, Сардор Абдураимов, Шарифжон Раҳматов, Рустамхон Азимов, Азиз Ибрагимов.

Захирадан майдонга тушганлар: Ким Бо Ёнг, Сиёвуш Ҳабибуллоев, Исмоилжон Охунжонов.

Огоҳлантиришлар: Э.Паншанбе (89) – Ғ.Сарибоев (89).

Бугун Намангандаги “Марказий” ўйингоҳда “Навбаҳор” Яйпаннинг “Турон” жамоасига қарши майдонга тушди. Мазкур ўйинда жамоамиз 2:1 ҳисобида ғалаба қозонди.

Таъкидлаш жоизки, учрашув ўртоқлик мақомида бўлишига қарамай, ушбу баҳсга тўрт мингдан ортиқ мухлис ташриф буюрди.     

Ўйин борасида тўхталадиган бўлсак, учрашувнинг 1-бўлимида ташаббус кўпроқ жамоамиз тарафида бўлди. Натижада илк дақиқаларданоқ ҳужумкор руҳда ўйнаган Самвел Бабаян шогирдлари 16-дақиқадаёқ ҳисобни очишга муваффақ бўлишди. Ўша вазиятда Жамшид Искандеров жарима зарбасини амалга ошириб, тўпни рақиб жарима майдончаси ичига етказиб берди.  У ерда қулай вазиятда турган тажрибали ҳимоячи Игорь Голбан тўпни дарвозага аниқ йўллаб, ҳисобни очди - 1:0.

Урилган голдан руҳланган “лочинлар” ҳужумкорликни янада оширишди. Бу эса 38-дақиқада ўз самарасини берди. Мезбонларнинг навбатдаги бурчак зарбасидан сўнг, сербиялик тажрибали ҳужумчи Зоран Марушич тўпни боши билан Акмал Турсунбоев қўриқлаётган дарвозага аниқ йўллаб, ҳисобдаги фарқни оширди – 2:0.

Натижада жамоамиз танаффусга 2:0 ҳисобидаги ютуқ билан чиқиб кетди.

Иккинчи бўлимда “Навбаҳор” устози Самвел Бабаян майдонга ёш футболчиларни тушириб, синовдан ўтказди. Бу эса яйпанликларга ҳужумкор ўйин намойиш этишга имконият яратди. Натижада Анвар Бердиев шогирдлари 55–дақиқада ёш ҳужумчи Рустамхон Азимовнинг голидан сўнг, ҳисобдаги фарқни қисқартиришди – 2:1.

Шундан сўнг, яна устунликни ўз қўлига олган “лочинлар”нинг навбатдаги ҳужумидан сўнг, захирадан майдонга туширилган ёш ҳужумчи Иброҳим Ғанихоновнинг зарбасига аниқлик етишмади. Яна бир вазиятда эса захирадан майдонга туширилган маҳоратли ярим ҳимоячи Шерзод Ғуломжоновнинг дарвозадан 25 метрлар чамаси узоқликдан амалга оширилган жарима зарбасидан сўнг, тўп дарвоза тўсинига тегиб қайтди. Натижада ҳисоб ўзгаришсиз қолди ва мазкур баҳсда “лочинлар” 2:1 ҳисобида зафар қучишди.