«Ньюкасл» ва «Лион» бразилиялик яримҳимоячи Бруно Гимараэшнинг инглиз клубига трансфери шартларини келишиб олди. Бу ҳақда журналист Фабрицио Романо твиттерда хабар берди.

24 ёшли яримҳимоячи учун «қарғалар» 40 миллион евро тўлайди, келишувда 8 миллион еврогача (футболчининг ўйинларига қараб) бонуслар ҳам кўзда тутилган. Аввалроқ «Ньюкасл» футболчининг маошини 4 баравар оширишга тайёрлиги ҳақида хабар берилганди - энди Гимараэш ойига 220 минг евро олади.

Трансферни якунлаш учун агентларнинг тўловларини келишиш керак. Бу амалга ошиши билан «Ньюкасл» клуб ходимларидан бирини Брунони тиббий кўрикдан ўтказиш учун Бразилияга жўнатади.

Брунонинг «Лион» билан шартномаси 2024 йилнинг ёзига қадар амал қилади. Жорий мавсумда у француз клуби сафида барча мусобақаларда 25 та ўйинда майдонга тушиб, 6 та голли узатмани амалга оширди.