ЎзПФЛ бош директори Диёр Имомхўжаев Марказий Осиёдаги энг кучли икки футзал терма жамоалари кимлигини айтди.
"Яқиндагина Ўзбекистон ва Қозоғистон футзал термалари 2 та ўртоқлик ўйинида залга чиққанди. Бирида қўшниларимиз, бошқасида биз ғолиб келдик.
Кеча футзалчиларимиз Франция футзалчиларига қарши залга чиқиб, 2:4 ҳисобида имкониятни бой берди. Қозоғистон термаси эса Европа чемпионатида Италия устидан 4:1 ҳисобида устун келиб, чорак финалга йўл олди.
Жамоавий спорт турларидан муаммоларимиз етарли экани маълум. Аммо гап футзал ҳақида кетса, Марказий Осиёда 2 та яхши куч бор: Қозоғистон ва Ўзбекистон. Афсуски, футзал олимпия спорт турлари орасида йўқ", - деб ёзди Имомхўжаев.
