Киевнинг «Динамо» клуби ҳужумчиси Владислав Супряга фаолиятини Италиянинг «Сампдория» жамоасида давом эттириши аниқ бўлди.
Италиялик журналист Маттео Корсеттининг тарқатган маълумотига қараганда, томонлар ўзаро келишувга эришган ва ўзаро битим тузишган. Ҳозирда клублар ҳужжатлар масалаларини ҳал қилишмоқда.
Қайд этилишича, украиналик ҳужумчи "Сампдория" клуби учун тиббий кўрикдан ўтиш учун Италияга етиб келди. Маълум қилинишича, яқин соатлар ичида шартнома имзоланади ва расман эълон қилинади.
«Сампдория» украиналик ҳужумчини кейинчалик 8 миллион еврога сотиб олиш шарти билан икки йилга ижарага олмоқда.