«Милан» ҳимоячиси Алессандро Неста «Барселона»га қарши ЕЧЛ 1/4 финал жавоб учрашувидаги иккинчи пенальти билан боғлиқ вазиятга изоҳ берди. Бу ҳақда «Sky Sport Italia» хабар бермоқда.

Бу вазиятда Неста Бускетснинг футболкасидан тортиб қолган, унинг ўзини эса Карлесь Пуйоль туртиб юборганди. Эслатиб ўтамиз, «Барселона» икки ўйин натижасига кўра 3:1 ҳисобида ғалаба қозониб, ярим финал йўлланмасини қўлга киритди.

«Мен Бускетсни бироз туртиб юбордим. Бироқ бунгача орқадан Пуйоль мени ёпиб қўйганди — менга нисбатан ўйин қоидаси бузилганди. Нима бўлганда ҳам, менимча, ҳакам тўп ўйинга киритилгунига қадар қоидабузарликни қайд этиб бўлганди», деди Неста.

«Италиядаги ҳакамлар қоидабузарликларни кўпроқ қайд этишади, Европанинг қолган қисмида эса камроқ, лекин у ерда футболкадан тортиб қолганлик учун кўпроқ пенальти белгилашади. Ўйлашимча, бугун ҳакам ўйинни бундан яхшироқ бошқара олмасди», деди италиялик футболчи.

«Биз қарши ҳужумларда яхшироқ ҳаракат қилишимиз мумкин эди, шундай ҳужумлардан бирида гол ҳам урдик. Бир неча дақиқа давомида «Барселона»ни қўрқита олдик ҳам, лекин кейин бунинг уддасидан чиқа олмадик. Бу «Барселона»га қарши ўйинларда хатога йўл қўймаслик керак», деди «Милан» ҳимоячиси.

«Аввалги ўйин натижаси бизнинг фойдамизга ҳал бўлган эди, бироқ «Барселона»да, менимча, жамоанинг 70 фоизини ташкил этадиган Лионель Месси бор. Унинг ўзи ҳисобдаги фарқни тўғрилаб қўйди», дея қўшимча қилди «Милан» ҳимоячиси Алессандро Неста.