Туриннинг “Ювентус” клубининг янги яримҳимоячиси Денис Закария «бьянконерилар» футболчиси сифатидаги тақдимот маросимида Италия клубига ўтиши ҳақида фикр билдирди.

“Мен “Ювентус”ни танладим, чунки бу мен орзу қилган даражадаги клуб. Бу фаолиятимни давом эттириш учун энг яхши вариант, деб қарор қилдим. Мен “Боруссия” [Мюнхенгладбах] раҳбариятига жамоани тарк этишимни билардим ва улар менга шароит яратиб берди.

Ахир, “Ювентус”дек жамоа ҳар куни ҳам сенга таклиф билан чиқмайди. Умид қиламанки, жамоага ёрдам бера оламан.

Мен Туринда эканлигимдан фахрланаман. Отам “Ювентус”га мухлислик қилади, шунинг учун мен бу жамоа ҳақида кўп нарсаларни биламан. Қўлимдан келганини қилишга ва жамоадошларимга имкон қадар ёрдам беришга ҳаракат қиламан.

Мен ўзимни яхши ҳис қиляпман. Жамоа билан аллақачон иккита машғулот ўтказдим. Агар мураббийга керак бўлса, мен ўйнашга тайёрман. Аллегри мендан нима кутаётганини айтди, бироқ биз ҳозирча тафсилотларни муҳокама қилганимиз йўқ”, — деди Швейцария терма жамоаси яримҳимоячиси.