Turinning “Yuventus” klubining yangi yarimhimoyachisi Denis Zakariya «byankonerilar» futbolchisi sifatidagi taqdimot marosimida Italiya klubiga o‘tishi haqida fikr bildirdi.

“Men “Yuventus”ni tanladim, chunki bu men orzu qilgan darajadagi klub. Bu faoliyatimni davom ettirish uchun eng yaxshi variant, deb qaror qildim. Men “Borussiya” [Myunxengladbax] rahbariyatiga jamoani tark etishimni bilardim va ular menga sharoit yaratib berdi.

Axir, “Yuventus”dek jamoa har kuni ham senga taklif bilan chiqmaydi. Umid qilamanki, jamoaga yordam bera olaman.

Men Turinda ekanligimdan faxrlanaman. Otam “Yuventus”ga muxlislik qiladi, shuning uchun men bu jamoa haqida ko‘p narsalarni bilaman. Qo‘limdan kelganini qilishga va jamoadoshlarimga imkon qadar yordam berishga harakat qilaman.

Men o‘zimni yaxshi his qilyapman. Jamoa bilan allaqachon ikkita mashg‘ulot o‘tkazdim. Agar murabbiyga kerak bo‘lsa, men o‘ynashga tayyorman. Allegri mendan nima kutayotganini aytdi, biroq biz hozircha tafsilotlarni muhokama qilganimiz yo‘q”, — dedi Shveysariya terma jamoasi yarimhimoyachisi.