ESPN нашрининг хабар беришича, "Челси" жамоаси сардори Жон Терри "Бенфика" билан бўлган баҳсда қовурғасини синдириб олган бўлиши мумкин.
Терри бугун шифокорлар кўригидан ўтказилади ва агар ҳақиқатдан ҳам қовурғасининг сингани тасдиқланса, "Челси" сардори жамоасига бир нечта ўйинларда ёрдам бера олмайди.
"У ўйин пайтида қовурғасининг оғриётганини ва синганлигини айтганида, биз Террини алмаштиришга қарор қилдик, - дейди "Челси" клуби мураббийи Ди Маттео. - Биз эртага уни шифокорлар кўригидан ўтказамиз ва шундан кейингина, Террининг аҳволи ҳақида якуний хулосага келамиз. Умид қиламанки, сардоримиз яқин орада соғайиб сафимизга қайтади".
Эслатиб ўтамиз, Жон Терри Чемпионлар лигаси чорак финал баҳсида "Бенфика" билан ўйинда майдонга тушган ва 59-дақиқада Кехиллга алмаштирилган эди.













