"Бухоро" футбол клуби бош директори Ўткир Қодировга бир неча саволлар билан юзландик.

— Ўткир Олимович, ҳозирда «Бухоро» футбол клубида олиб борилаётган ишлар, қилинажак вазифалар ҳақида қисқача сўзлаб берсангиз.
— Мен «Бухоро» футбол клубида бош директор вазифасида иш бошлаганимга, эндигина бир ой бўлди. Албатта, тарихи буюк жамоада раҳбар бўлиб ишлашнинг, ўзига яраша маъсулияти кучли бўлади. Ҳозирги кунга қадар, клуб олдида турган муаммоларни бартараф этиш учун, тиним билмай ишлаяпмиз, чунки янги мавсумга кўп вақт қолмади. Ўтган мавсумда, жамоамизда тўп сурган легионер футболчилар, Рахат Жапаров ва Марко Милич билан бўлган тушунмовчиликларни, деярли ҳал қилиб бўлдик. Шунингдек техник директор лавозимида ишлаган Бахтиёр Дадаматов билан келишувга эришдик. Лекин, ҳали қилиниши керак бўлган ишлар талайгина, тожикистонлик икки мураббий ёрдамчилар ва бир футболчи билан музокоралар олиб борилмоқда. Умид қиламанки, ушбу масалалар ĥам, яқин вақи ичида, ижобий эчимини топади.

— Бу йилги «Бухоро» жамоасининг селекция ишлари қандай ўтди, таркиб ҳақида нима дея оласиз.
— Бухоро футболини ривожлантириш мақсадида ташкил этилган «Кенгаш» аъзолари томонидан, бош мураббийликка Ҳаким Фузайлов номзоди тасдиқлангач, унга Суперлига йўлланмасини қўлга киритиш асосий вазифа сифатида юклатилди. Ҳаким Фузайлов жамоани шакллантириш ва селекция ишларини тўлиқ ўзи олиб бормоқда. Мен эса бош директор сифатида, фақат молиявий масаларни ҳал қилиб боряпман. Жамоамизда бир қатор тажрибали футболчилар жам бўлишди. Умид қиламанки, барчамиз бир аҳил оила бўлиб, «Бухоро» жамоаси олдида турган барча муаммоларни бартараф этиб, янги мавсумга шай ҳолатда майдонга чиқамиз. Мухлислар катта футболни, қолаверса севимли жамоамиз бўлмиш «Бухоро»нинг ўйинларини соғинишган. Насиб қилса, ушбу мавсумда уларни хурсанд қилиш, жамоамизни Суперлига йўлланмасига эга бўлиши учун боримизни берамиз. Бизнинг мухлислар бунга арзийди.