Норвегиялик 45 ёшли ҳакам Том Ҳеннинг Эвребёнинг айтишича, ҳалигача унинг электрон почтасига  "Челси" мухлисларидан ҳақоратли хатлар келиб турар экан.

2009 йил май ойида "Стэмфорд Бриж" стадионида ўтказилган "Челси" ва "Барселона" жамоалари ўртасидаги ЕЧЛ ярим финал жавоб учрашувини бошқариб борган норвегиялик ҳакам тўрт марта пенальти белгиланиши мумкин бўлган вазиятларда "Барселона" дарвозасига томон пенальти қўймаган эди.

The Guardian нашрига берган интервьюсида Эвребё ҳали ҳануз "Челси" мухлисларининг таҳдидли ва ҳақоратли мактублар олиб туришини айтиб ўтди.

"Ҳаммаси ортда қолган бўлса ҳам, электрон почта орқали йилига уч-тўртта  хатлар олиб тураман. Албатта, бу мен учун ёқимли эмас ва шу билан бирга ҳеч қандай жиддий ҳам эмас. Бундан на мен, на оилам хафа бўлмаймиз. Оиламдагилар ушбу хатлар ҳақида деярли ҳеч нарса билишмайди ва мен уларга кўрсатмасликка ҳаракат қиламан".

Уч йил олдинги ўйин ҳақида гапирар экан норвегиялик ҳакам шундай деди: "Ортга назар ташлайдиган бўлсак, кўп ишларни амалга оширдим ва уларнинг аҳамияти турлича. Уларнинг ҳар биридан кўп нарса ўргандим. Лекин ҳамма ҳакамдан сўрасангиз, уларда ҳам яхши ва ёмон бошқарган учрашувлари бўлади. Баъзи вазиятларда ҳаммасини яхши бажарсалар, баъзан хатога йўл қўядилар. Бу — ҳакамлар фаолиятининг бир қисми. Мен битта ўйиндан пушаймонлик сақламайман, чунки ҳаётим давом этиши керак".