Ўзбекистон миллий терма жамоасининг ЖЧ-2014 тўртинчи саралаш босқичидаги рақиби Эрон миллий терма жамоасининг 17 апрель куни БААга қарши ўртоқлик ўйинида майдонга тушиши борасида хабар бериб ўтгандик. Саралашдаги яна бир рақиб – Жанубий Корея миллий терма жамоаси 30 май куни амалдаги жаҳон ва Европа чемпиони Испанияга қарши ўртоқлик ўйинида иштирок этадиган бўлди. Беллашувнинг қайси мамлакатда бўлиб ўтиши борасида аниқ қарорга келинмаган.
Ўзбекистон миллий терма жамоаси 3 июнь куни саралашни Эронга қарши ўйин билан Тошкентда бошласа, Жанубий Корея 8 июнь куни Қатарга қарши кураш олиб боради. Сабаби «Осиё йўлбарслари» саралашдаги илк турни ўтказиб юборишади.
Маълумот ўрнида қайд этиш жоиз, Ўзбекистон миллий терма жамоаси 22 май куни Тошкентда тўпланади. Режага кўра 27 май куни Уммон миллий терма жамоаси Тошкентда меҳмон бўлиши керак эди. Бироқ мамлакат ЖЧ-2014 саралаш режаларига ўзгартириш киритгани сабабли, уммонликлик Тошкентга кела олмайдиган бўлишди. Айни пайтда ЎФФ Уммон миллий терма жамоасининг ўрнига бир қатор мамлакат футбол федерациялари билан музокара олиб бормоқда. Эронга қарши 3 июндаги беллашув Тошкентда бўлиб ўтиши сабабли, 27 май кунги рақиб ҳам фақатгина Тошкентда қабул қилинади.
