Суперлига янги мавсумига қуръа ташлангач, «Динамо» жамоаси чемпионатни амалдаги чемпион «Пахтакор»га қарши ўтказадиган бўлди. Қуръадан кейин клуб матбуот хизмати жамоа бош мураббийи Предраг Роганнинг фикрлари билан қизиқди.

«Очиғини айтсам, қуръа ҳақида ўйлаганим ҳам йўқ. Сабаби, биз мавсум давомида эртами ё кеч барибир барча жамоалар билан уйда ва сафарда ўйнашимиз лозим.

Барча рақибларимиз билан қайси турда ўйнашимиз аниқ бўлди. Илк турда ўз майдонимизда мамлакатнинг амалдаги чемпионига қарши майдонга тушиш биз учун катта шараф. Биз мезбон сифатида ўз майдонимизда «Пахтакор»га мардонавор қаршилик кўрсатиб, мавсумни юқори кайфиятда бошлаш ва Самарқанд аҳлини хурсанд қилиш учун боримизни берамиз.

Фурсатдан фойдаланиб, самарқандлик барча мухлисларни «Пахтакор»га қарши учрашувга таклиф этиб, биз яратаётган янги жамоани қўллаб-қувватлашингизни, футболчилар эса «Динамо» шарафини муносиб ҳимоя қилиш учун бор куч ва имкониятларини ишга солишади. Ғалабаларга мухлислар билан бирга эришамиз. Олға, «Динамо»!», - дейди клуб бош мураббийи сербиялик Предраг Роган.

Маълумот учун, Суперлига 1-тури доирасидаги «Динамо» - «Пахтакор» учрашуви 2-5 март оралиғида ўтади.