«Реал» устози Карло Анчелотти Ла Лиганинг 24-тур доирасида «Вильярреал» (0:0) жамоасига қарши бўлиб ўтган ўйиндан кейинги фикрлари билан ўртоқлашди.

«Иккинчи бўлимдан қониқдим, биринчи бўлимга қараганда яхшироқ ўйнадик. Танаффусдан кейин гол киритиш учун кўплаб имкониятларга эга бўлдик, шу руҳда давом этишимиз керак.

Биринчи бўлимда бизда тажовузкорлик етишмади. Орқага қайтиш мумкин, лекин тажовузкор ўйин кўрсатиш керак, шу нарса бизда биринчи бўлимда бўлмади. Иккинчи бўлимда эса рақибдан кўп ҳолларда тўпни олиб қўйдик.

Бироз омадимиз келмади, чунки, иккита зарбамиз рақиб дарвозаси устунига тегди. Шунингдек, рақиб посбони яхши сэйвларни амалга оширди. Улар аниқроқ ҳаракат қилишди, аммо биз ғалаба қозонишимиз мумкин эди.

Бэйл яхши ўйнади. Биз ундан майдонда қандайдир ишларни қилишини сўрадик ва у талабимизни яхши бажарди. Иккинчи бўлимда унда голли вазият бўлганди, бироқ унинг омади келмади.

Ла Лига – ҳалигача барча учун мураккаб турнир. Ғалаба қозонмадингми, сенга қийин бўлади», – деди Анчелотти.