«Милан» мавсум якунига етганидан сўнг «Манчестер Сити» ҳужумчиси Карлос Тевесни сотиб олиш учун яна бир бор уриниб кўради. Бу ҳақда «La Gazzetta dello Sport» хабар бермоқда.

Дастлаб, «россонерилар» «шаҳарликлар»нинг бошқа бир ҳужумчиси – Марио Балотеллини сотиб олиш ниятида эдилар, бироқ сўнгги вақтларда бу футбочлини эски жамоаси – «Интер»га қайтиши мумкинлиги ҳақида гап-сўзлар кўпайди. Шунинг учун ҳам амалдаги Италия чемпионлари Тевес билан боғлиқ савдони «пишитиш»га кўпроқ эътибор қаратишмоқда. Таъкидлаш жоиз, миланликлар бу ҳужумчини шу йилнинг январидаёқ ўз таркибларига қўшиб олмоқчи бўлишганди.

Мавсум оралиғида «Милан» икки ҳужумчиси – Алешандре Пату ҳамда Филиппо Инзаги билан хайрлашиши эҳтимоли катта. Тевес бўйича музокараларда эса «Милан» вице-президенти Адриано Галлиани билан футболчининг агенти – Киа Журабчян ўртасида яхши алоқалар муҳим роль ўйнаши мумкин.

Италия нашрларига кўра, «Милан» ёзда сотиб олмоқчи бўлган футболчилар орасида уч нафар ярим ҳимоячи — Риккардо Монтоливо («Фиорентина»), Сейду Кейта («Барселона») ва Сандро («Тоттенҳэм») бор.