Ўзбекистон Олий Лигасидан ўрин олган «Бухоро» ва «Машъал» жамоалари ўртасидаги учрашув ниҳоясига етгач, меҳмонлар бош мураббийи Владимир Фомичёвнинг ўйин борасидаги фикрлари билан ўртоқлашди. Биринчи навбатда Фомичёв майдон борасида салбий фикрларини билдириб ўтди.
«Бундай майдонда умуман футбол ўйнаб бўлмасди, буни бугунги баҳс ҳам кўрсатиб берди. Менимча, ҳужумкор футбол намойиш этилмаганининг боиси ҳам айнан шу билан боғлиқ бўлса керак. Бундай майдонларда олий лига баҳсини ўтказиш ПФЛ учун уят ҳисобланади. Бу биринчи навбатда ўзига ва футболга нисбатан ҳурматсизлик дегани. Учрашув давомида ҳар иккала жамоа асосан узоқ масофага тўп узатишлардан фойдаланди. Чунки бундай майдонда қисқа тўп узатишлар орқали футбол ўйнашнинг умуман иложи йўқ эди».
«Мени дуранг натижа қониқтирдими? Албатта, ғалаба қозонсак яхши бўларди. Лекин сафарда дуранг ҳам ёмон натижа эмас. Бунинг устига «Бухоро» билан кечадиган баҳслар биз учун ўзига хос дерби ҳисобланади. Ўйиннинг боришига қараб дурангдан қониқдик десам бўлади. Шу ўринда жуда чиройли гол ургани учун Самандар Шодмоновга раҳмат айтиб қўймоқчиман.
«Бугунги ўйинда ҳеч кимга жиддий эътироз йўқ. Фақат дарвозабонимиз Санжар Қувватовдан камроқ қўпол хатоларга йўл қўйишини сўраган бўлардим. Бугун ҳамма қўлдан кечганча ҳаракат қилди».
«Биз «Бухоро»нинг ҳужумкор ўйин кўрсатишини, шунингдек стандарт вазиятларга кўпроқ эътибор қаратишини билардик. Баъзи вазиятларни ҳисобга олмаганда рақиб бизга жиддий қаршилик туғдира олмади. Агар ўйиннинг охирларида ҳакам пенальти белгилаганида ютиб кетишимиз ҳам мумкин эди», дея мураббийнинг сўзларидан иқтибос келтирмоқда клуб расмий сайти.
