Бугун “Металлург” Туркия йиғинидаги сўнгги кўрик учрашувини ўтказади. Рақиб 2021 йилги Грузия чемпионатининг бронза медали совриндори Гори шаҳрининг “Дила” жамоасидир. “Металлург” сингари янги мавсумга тайёргарлик кўраётган “Дила” учун ҳам мазкур ўйин хориждаги охирги кўрик ўйини бўлади. Грузиянинг 2022 йилги чемпионати 26 февраль санасида старт олади.

Қуйида бўлғуси Грузия клуби ҳақида қисқача маълумот бериб ўтсак. “Дила” футбол клубига 1949 йилда асос солинган. Жамоага украиналик мутахассис Андрей Демченко бош мураббийлик қилади. 1990 йилдан Грузия чемпионатида мунтаззам қатнаши келаяпти. Энг яхши натижасига 2014/2015 йилги мавсумда эришган – мамлакат чемпиони бўлган. 2011/2012 йилги мавсумда эса Грузия кубогига сазовор бўлган. 2004 йилдан Европа кубоклари мусобақаларида қатнашиб келади. Интертото, Европа лигаси, УЕФА чемпионлари лигаси мусобақаларининг қатнашчиси. Янги мавсумда УЕФА конференция лигаси кубогида Грузия шарафини ҳимоя этади.

Жамоанинг айни пайтдаги таркибида бир қатор легионер ўйинчилари ҳам бор. Булар – ҳимоячилар Патрик Эту (Конго), Тьерри Манзи (Руанда), Вандерсон, Алеф Сантос (Бразилия), ярим ҳимоячилар – Амос Ненди (Кения), Франциско Мадинга (Малави), ҳужумчилар – Усмон Камара (Гвинея), Дидье Кугбеня (Того) лардир.