ФИФА бугун дунё терма жамоаларининг навбатдаги рейтингини эълон қилди. Унаг кўра, Ўзбекистон миллий терма жамоаси 2 поғона пастга тушиб, 69-ўринда қайд этилди. Хитой терма жамоаси яна терма жамоамиздан ўтиб кетгани учун, Ўзбекистон Осиёнинг 6-жамоасига айланиб қолди.

Австралия терма жамоаси умумий рейтингда 1 поғона (21-ўрин) тушган бўлса-да, ҳамон Осиёнинг энг яхши термаси бўлиб турибди. Япония эса 1 ойлик танаффусдан кейин яна Ж.Кореядан ўтиб кетди. Японлар 3та ўрин кўтарилишди, кореяликлар эса 1та ўринга пастлашди. Натижада улар қўшни қаторларга жойлашишди (30 ва 31-ўринлар). Эрон эса ўзининг 51-ўрнини сақлаб турибди.

Ўзбекистоннинг ЖЧ-2014 саралаш гуруҳидаги рақибларига эътибор қаратадиган бўлсак:
Жанубий Корея. Юқорида айтиб ўтдик, 31-ўринни эгаллаб турибди;
Эрон. 51-поғонада қайд этилган;
Қатар. 4 поғона пастга "шўнғиган" ва 84-ўринни эгаллаб турибди.
Ливан. Бу терма жамоа ҳам 4  ўрин пастлаган ва 128-поғонага жойлашди.

Энг яхши кўтарилишга эришган жамоалар:
25 - КХДР (ОФК Чақирув кубогида ғолиб чиқди)
24 - Туркманистон (ОФК Чақирув кубогида финалгача борди)
14 - Тожикистон

Энг кўп пастга тушганлар:
-21 - Грузия
-20 - Исроил ва Куба
-14 - Капе Верде

Жадвалнинг юқори қисмида эса ўзгаришлар юз берди. Голландия терма жамоаси 2-поғонадан 4га тушиб кетди. Германия ва Уругвай терма жамоалари 1 ўрин кўтарилиб олишди. Испания эса 1-ўринни ҳали-бери ҳеч кимга бўшатмаса керак. Лекин испанлар нақд 119 очко йўқотишган.

Португалия 5га кўтарилган бўлса, Бразилия 6-ўринга тушди. Англия ҳам ўз ўрнини 6дан 7га пасайтирган. Аргентинанинг 10-ўринга тушиб кетиши натижасида Хорватия ва Дания 8 ва 9-ўринларга чиқиб олишди. Россия эса 11-ўринга кўтарилган бўлса (+1), Италия 3 поғона пастлаб, кучли ўнликни тарк этди.

Рейтингнинг тўлиқ кўриниши билан ФИФА сайтида танишиб олишингиз мумкин.