Мексика чемпионатининг 9-туридан ўрин олган «Керетаро» – «Атлас» учрашуви Сантяго-де-Керетародаги «Коррегидора» стадионида мухлислар иштирокидаги шиддатли муштлашувдан сўнг тўхтатилди.

«Керетаро» Хулио Ферчнинг голидан сўнг 60-дақиқада ўз майдонида 0:1 ҳисобида мағлуб бўлаётганди. Кутилмаганда трибунада муштлашув бошланди. "Керетаро" мухлислари ҳам майдонга югуриб, ВАР жиҳозларини вайрон қилишди. Мухлисларнинг бир қисми ёш боладан рақиб жамоа футболкасини ечишга мажбур қилишган. Ҳалок бўлганлар ҳақида ҳали маълумот берилмади, фақатгина 22 нафар мухлис жароҳат олгани ҳақида хабар берилди.

«Коррегидора стадионида қабул қилиб бўлмайдиган ва бахтсиз зўравонлик. Стадионда қўриқлаш таъминланмагани учун айбдорлар жазоланади. Футболчиларимиз ва мухлисларимиз хавфсизлиги устувор вазифа!», деб ёзди Мексика чемпионати президенти Микел Арриола ўзининг "Твиттер"даги расмий саҳифасида.

Хавфсизлик нуқтаи назаридан ўйин қайта бошланмади ва бошқа санага кўчирилади. Лига воқеа юзасидан тергов ишларини бошлади.