Бугун "Болтон" яримҳимоячиси Фабрис Муамбага касалхонадан жавоб берилди ва у бугун оиласи қучоғига қайтди.
Эслатиб ўтамиз, 17 март куни "Тоттенҳэм"га қарши ўтган Англия кубоги чорак финал учрашуви чоғида майдонга йиқилган Муамбанинг юраги урушдан тўхтаган эди. 78 дақиқа мобайнида футболчи клиник ўлим ҳолатида бўлган.
Фақатгина врачларнинг тезкор ва батартиб ёрдамлари туфайли Фабрис омон қолди, футбочининг юраги яна уриб кетди. Ўтган ҳафта ичида Муамба кичик жарроҳлик операциясини бошидан ўтказди ва бундай фожеа қайта рўй бермаслиги учун унинг териси остига дефибриллятор ўрнатилди.
Дастлабки кунлардаги оғир аҳволига қарамасдан, Муамба ҳозир ўзини жуда яхши ҳис қилмоқда. Дўхтирлар уни касалхонада ортиқ олиб қолишдан маъно кўришмади. Касалхона кароватида ўзининг 24 ёшини қарши олган Фабрисга жавоб берилди.
Ўзининг баёнотида Муамба шифокорларга миннатдорчилик билдириб, уларнинг олдида бутун умр қарздор эканлигини таъкидлади. Фабрис тўлиқ тикланиш жараёнини оиласи даврасида ўтказишидан хурсанд.
