Халқаро футбол федерацияси (ФИФА) Польша терма жамоасини автоматик тарзда ЖЧ-2022 саралаш босқичи финалига олиб чиқиб, спорт тамойилини бузди. Бу фикрни Швеция футбол иттифоқи бош котиби Хокан Шёстранд билдирди. Унинг фикрини ТАСС ташкилот матбуот хизматига таяниб бермоқда.
Саралаш босқичида польшаликлар 29 март куни Швеция ва Чехия терма жамоалари ўртасидаги бўлиб ўтадиган ўйин ғолиби билан ўйнайди. 24 март куни бўлиб ўтиши керак бўлган ярим финалда Польша термаси Россия терма жамоаси билан учрашиши керак эди, бироқ 28 февраль куни ФИФА ва Европа футбол ассоциациялари иттифоқи (УЕФА) Россия терма жамоасини халқаро мусобақаларда иштирок этишдан четлатди.
«Ўйлаймизки, спорт нуқтаи назаридан польшаликлар бошқа рақибга қарши ўйнаши оқилона ва адолатли бўларди. Биз ФИФА учун бу қийин вазифа эканини тушунамиз, аммо шунга қарамай, бир хил шартлар билан ўйнаш, яъни Жаҳон чемпионати финалига чиқиш учун иккита ўйин ўтказиш ва ғалаба қозониш тамойилига амал қилиш керак” - деди Шёстранд.
