"Насаф" ва "Ар-Райян" ўйинидан сўнг анъанавий матбуот анжуманининг биринчи қисмида меҳмонлар жамоаси бош мураббийи Д.Агирре иштирок этди.

Диего Агирре: — Биз ўз мақсадимизга эришдик, сафарда ғалаба қозондик. Ўйинчиларимизнинг ҳаракатидан кўнглим тўлди. Ҳамма яхши ҳаракат қилди, Афонсо Алвеш гол ура олмаса-да, у ўзининг яхши ўйинларидан бирини бугун намойиш эта олди. Биз гуруҳ босқичидан чиқишга ўзимизга яхши имконият яратдик.

— "Насаф"нинг ўйини ҳақида нима дея оласиз?
— Яна такрор айтаман, биз бугун яхши ўйин ўтказдик, шунинг учун биз мезбонларга ҳеч қандай имкон қолдирмадик.

— Бугун яна икки марта "Насаф" дарвозасига ўйинчиларингиз тўп киритишди, аммо бу ҳисобга олинмади. Бунга қандай фикр билдирасиз?
— Бугун ўйинни бошқарган ҳакамлар жуда яхши савияда ишлашди, бизда ҳеч қандай эътирозлар йўқ.