Кеча Россия Биринчи дивизиони 47-турида «Сибирь» ва «Алания» клублари Новосибирскдаги «Спартак» стадионида тўқнаш келишди. Мезбонлар сафида Ўзбекистон миллий терма жамоасига аъзо футболчи Вагиз Галиулин ҳаракат қилса, владикавказликлар шарафини терма жамоанинг яна икки нафар аъзоси – Санжар Турсунов ҳамда Марат Бикмаев ҳимоя қилишади.

Ўзбекистонликлар тўп сураётган ҳар икки клуб мавсумдаги дастлабки икки давра ўйинларидан сўнг кучлилар сафига кира олишганди. 8та клуб иштирок этаётган кучлилар зонасида «Сибирь» 7-ўринни эгаллаб турган бўлса, 3-ўринда бораётган «Алания» Премьер-лига сари жиддий кураш олиб бормоқда.

Томонларнинг ўзаро ўйинида уч нафар ўзбекистонлик легионер асосий таркибда майдонга туширилди. Санжар Турсунов 69-дақиқага ҳаракат қилган бўлса, унинг жамоадоши Марат Бикмаев 85-дақиқада алмаштирилди. Мезбонлар сафида ўйнаган Вагиз Галиулин эса Бикмаевдан бир дақиқа кўпроқ майдонда бўлди. 62-дақиқада «Сибирь» Астафьевнинг голи билан олдинга чиқиб олган бўлса, 5 дақиқадан кейин автогол натижасида ҳисоб тенглашди. «Алания»га ғалаба келтирган гол 93-дақиқада пенальтидан киритилди. Мазкур турда дастлабки икки ўринни эгаллаб турган «Мордовия» ва «Нижний Новгород» клублари 2тадан очко бой беришди. Шу тариқа 3-ўринни эгаллаб турган «Алания» пешқадамдан 2 очко, 2-ўрин эгасидан 1 очко ортда қолмоқда.

Маълумот ўрнида айтиш керакки, мазкур уч легионердан икки нафари – Санжар Турсунов ва Вагиз Галиулин ЖЧ-2014 тўртинчи саралаш босқичи доирасидаги Эронга қарши ўйинда Ўзбекистонга ёрдам бера олишмайди. Учинчи саралаш босқичидаги Тожикистонга қарши Тошкентда кечган ўйинда (3:0) олинган сариқ карточкалар туфайли, бу футболчилар ФИФА томонидан қўшимча 1та ўйинга дисквалификация қилинган. Эслатиб ўтамиз, Ўзбекистон миллий терма жамоаси 22 май куни Тошкентда тўпланади.