Каталониянинг "Барселона" клуби президенти Сандро Россель, Испан ОАВга берган интервьюсида клубнинг ҳозирги сиёсати ва жамоани келажакда нималар кутаётгани билан ўртоқлашди.
"Футбол турли босқичлардан иборат. Шунингдек ҳар доим ғалаба қозонишнинг имкони йўқ. Вақти келади ва "Барселона" ҳам мағлубиятга учрай бошлайди. Аммо биз ўзимиз танлаган сиёсатимизни ҳурмат қилишимиз ва уни ҳимоя қилишимиз зарур". дейди Россель
"Биз барча муваффақиятларимизга нафақат майдонда, балки майдон ташқарисида олиб борган сиёсатимиз туфайли эришдик. Буни давом эттиришимиз керак.
"Иқтисодий масалаларга келсак, мен клубга келганимда унинг 500 миллион еврога яқин қарзи бор эди. Аммо биз бир қатор ҳомийлик шартномалари туфайли уларни бартараф этишга муваффақ бўлдик.
"Айниқса, Qatar Foundation билан тузилган кўп йиллик ҳомийлик ва ҳамкорлик шартномаси бизга қўл келди.
Клубнинг ривожланиш стратегиясига келсак, биз бу борада Мюнхеннинг"Бавария" клубининг бир неча йиллик иқтисодий моделини энг яхши вариант деб ўйлаймиз. Улар олиб борадиган сиёсат биз учун ҳам энг маъқул вариант" - дейди Россель испаниялик журналистлар билан мулоқот чоғида.
