"Тоттенхем" бош мураббийи Антонио Конте жамоаси ҳужумчиси Харри Кейнни Англия Премьер-лигасида меҳмондаги голлар сони бўйича рекордчи бўлгани билан табриклади.
“Мен Кейн учун хурсандман, чунки у ҳар бир ўйинда жуда кўп имкониятларга эга ва жаҳон тоифасидаги форвард сифатида у доимий равишда гол ура оладиган жамоада ўйнаш имкониятидан завқланади. Ўйлайманки, Харри ўз фаолиятида нимадир ютишга лойиқ эди, чунки у фантастик футболчи", - дея Конте сўзларини келтиради BBC Sport.
Кеча АПЛ 16-туридан ўрин олган "Брайтон"га қарши қолдирилган ўйинда (2:0) Кейн гол урди ва лига тарихидаги сафар ўйинларида энг кўп гол урган футболчига айланди. Ҳужумчи сафарда 139 та ўйинда 95 та гол урган.
Аввалги рекорд “Манчестер Юнайтед”нинг собиқ ҳужумчиси Уэйн Рунига тегишли бўлиб, у сафарда 243 та ўйинда 94 та гол урган эди.
